VOORTREKKERS

2018

DERDE KWARTAAL
Die graad 8- en 9-Voortrekkergroep bestaan uit 99% nuwe lede wat baie min kennis het van die Voortrekkers. Daarom is daar die begin van die kwartaal moeite gedoen om hul kennis van die Voortrekkers te verbreed. Die Voortrekkerwapen is aan hul bekend gestel deur gebruik te maak van lekkernye en verder is die verskillende doelstellings (Kodes) van die Voortrekkers bespreek sodat die nuwe lede ‘n bewustheid kan ontwikkel vir hul Afrikanerskap, Burgerskap en Christenskap. Die belangrikheid van die natuur en die bewaring daarvan is bevestig deur die wys van U-tube videos en hulle is bekendgestel aan riskante sportsoorte soos rotsklim in die Alpe van Europa.

Verder het die groep gespesialiseer in Vuurwapenkennis onder leiding van oud-polisieman, Nicky Alberts. Die groep het ook ‘n skietsessie bygewoon op die plaas van mnr. Jaco van Eeden waar hulle blootgestel is aan die skiet met verskillende vuurwapens.

Paul Jordaan  het gedurende die Julie-skoolvakansie die Winter-Waterwerk-Gebiedskamp van die Voortrekkers bygewoon waar hy gespesialiseer het in Varswaterkunde, Waterveiligheid en Waardes. Hy en Marius Stander het ook gedurende Septembermaand ‘n naweek op Wemmershoek bygewoon waar hulle leer dans het en aan ’n verskeidenheid van verskillende tipes dansvorme blootgestel is. Wat kan lekkerder wees om ‘n hele naweek deur te sokkie!

Dit is nog nie die einde van al die opwinding nie! Die volgende Voortrekkers gaan Swellendam Kommando verteenwoordig op die Wes-Kaap Gebiedskamp te Wemmershoek vanaf 29 September tot 6 Oktober: Graad 8 – Paul Jordaan; Graad 9 – Frans-Pieter Coetzer, Jaco Brink en Aidan Bruce. Ons wens hulle baie sterkte toe! Hulle gaan definitief ‘n baie opwindende vakansie beleef!

Eerste kwartaal
Die Voortrekkers het op ‘n hoë noot afgeskop vanjaar met 6 nuwe Graad 8 en 9 lede wat aangesluit het.

Die eerste byeenkoms van die jaar was reeds ‘n groot avontuur met ‘n besoek aan Felix Unite langs die Breërivier. Hulle het 16 Graad 7, 8 en 9 Voortrekkers met rubberbote op die rivier laat roei. Die stroomversnellings het vir groot opwinding gesorg. Nie eers die reën kon die opwinding demp nie!

Hierdie aktiwiteit is opgevolg met opleiding in lewensredding by die Dorpsdam onder die bekwame leiding van Mia Groenewald wat ‘n ervare lewensredder vir See en Sand is.

Valentynsdag is gevier met ‘n bergklimuitstappie na die Waterval in die Marloth Natuurreservaat. Almal het die verfrissende koue water getrotseer en daar is heerlik piekniek gehou op die rotse. Ons hoop dat daar volgende jaar brawe meisies sal wees wat die manne sal vergesel.

Dit was ‘n baie groot teleurstelling toe die Kommandokamp wat op Witsand gehou sou word, afgestel is weens slegte weer. Die Verkenners sou vanaf Witsand tot by St Sebastiaansbaai gestap het en die nag op die strand geslaap het. Die Kommando het toe maar in die plek daarvan ‘n swemuitstappie na die Dorpsdam gehou.

Die kwartaal gaan afgesluit word met ‘n spankamp op die plaas op Maandag, 26 Maart. Die opslaan van ‘n weermagtent, skyfskiet, kosmaak op die vuur en ‘n nagmars word beplan vir hierdie kamp.

111

TWEEDE KWARTAAL NUUS

Die eerste kwartaal is op ‘n opwindende hoë noot afgesluit met ‘n spankamp en oorslaap op ‘n Rûensplaas. Langs ‘n leë plaasdam en tussen ‘n paar Bloekombome het die gr. 8- en 9-spanlede ‘n weermagtent opgeslaan en nes geskrop vir die nag. Daar is skyfgeskiet, gebraai, roosterkoek en ‘cupcakes’ op die vuur gemaak. Verder is daar ordentlik genagmars en teen 12h00 is almal bed toe. Aangesien almal weer betyds moes wees vir skool die volgende oggend, moes die groepie maar vroeg roer. Die 2e kwartaal het afgeskop met ‘n gesamentlike Kommandobyeenkoms by die Voortrekkersaal waar die verskillende spanne plaatkoekies op ‘n blik oor ‘n olielampvlam gebak het. Dit het gesorg vir groot opwinding want dit is nie so maklik soos dit klink nie! Jazlynn was egter ‘n bobaas bakster! Met genoeg oefening kon mens darm later hierdie baktegniek bemeester, maar teen die einde van die middag het ‘n elektriese wafelpan gesorg dat almal versadig is toe ons begin wafels bak met die plaatkoekdeeg!! Op Dinsdag, 24 April 2018, is oor die dieper dinge van die lewe gesels toe die 10 kodes van die Voortrekkers bespreek is na aanleiding van Afrikaanse musiek. Elke kode is deur ‘n spesifieke liedjie voorgestel en die spanlede moes raai wat dit voorstel. Een van die hoogtepunte van die Voortrekkers se jaarlikse bedrywighede is die Inlywing waar al die nuwe Voortrekkers ingelyf word. Selfs al was jy in die Laerskool ‘n voortrekker, word jy nog steeds in gr. 8 as Verkenner ingelyf wanneer jy jou Hoërskoolloopbaan begin. Agt nuwe Verkenners is ingelyf.
Dit was ‘n groot oomblik vir die Kommando aangesien daar lanklaas soveel nuwe Verkenners ingelyf is.

In gr. 8 is Jazlyn van Heerden, Hendré van Zyl en Paul Jordaan ingelyf.
Die gr. 9’s het bestaan uit: Jaco Brink, Aidan Bruce, Francois Schutte, en Dian van Zyl. Frans-Pieter Coetzer en Louw Jordaan verteenwoordig die ou garde.
Tydens die Inlywing moes elke span ‘n held of heldin uit ons geskiedenis uitbeeld.
Die Verkenners het die verhaal van Jopie Fourie opgevoer, wat as 11-jarige seuntjie byna sy lewe deur ‘n Engelse Vuurpeleton in die Anglo-Boere oorlog verloor het. Sy heldhaftige optrede en weiering om die Boere se bewegings aan die Engelse te verklap, het die Engelse kaptein so beïndruk, dat hy nie deur die Engelse vuurpeloton geskiet is nie. Die Engelse Kaptein het hom self na die oorlog weer opgesoek. Daar is vir 2 byeenkomste baie hard geoefen aan hierdie konsert. Alhoewel almal maar op hul senuwees was en naels gekou het voor die tyd, het die gr. 8 en 9’s hulle onderskei as gesoute akteurs en hulle so goed van hul taak gekwyt.

Ons wil graag vir Paul Jordaan alles van die beste toewens vir die Winter Waterwerke Provinsiekamp wat hy gaan bywoon vanaf 24 Junie tot 29 Junie by die Theewaterskloofdam. Hy en sy broer Hanno, gaan Swellendam Voortrekkers daar verteenwoordig.