VOORTREKKERS

2019

DERDE KWARTAAL

Paul Jordaan, Jazlynn van Heerden en Jacques Jordaan,  het onderskeidelik die Graad 9 en 8 Winter Waterwerkkamp by die Theewaterskloofdam naby Villiersdorp die laaste week van die Julie- skoolvakansie bygewoon. Die Graad 8’s het gespesialiseer in varswaterkunde en die Gr 9’s in roeikunde.

Die kwartaal is gekenmerk deur 3 hoogtepunte, nl: Die jaarlikse Inlywing, die Oordstaptoer in Grootvadersbos en oom Jakkie van der Colf se epiese fietstoer vanaf die Voortrekkermonument in Pretoria tot by die Taalmonument in die Paarl.

Die Inlywing van al die nuwe Voortrekkers, as ook 3 nuwe Verkenners, nl. Jan-Hendrik Engelbrecht, Mieke Schoeman en Jacques Jordaan het plaasgevind op Donderdag, 25 Julie in die Voortrekkersaal. Die tema van die aand was Afrikaanse gedigte. Die Hoërskoolvoortrekkers het die ikoniese gedig, “ Die Kind”.  van Ingrid Jonker opgevoer. Die leerders het goed daarin geslaag om die brutaliteit van die polisie en die kinderlike onskuld van Die Kind uit te beeld in daardie moeilike Aparartheidsjare.

Die naweek van 24 tot 25 Augustus, is ‘n rugsakstap deur Riversdal se Voortrekkers o.l.v. mnr Tielman Roos by Grootvadersbos aangebied. Die Boosmansbosroete is gestap met asemrowende uitsigte oor die Overberg en Barrydale in die Klein-Karoo. Saterdagnag het al 12 stappers in ‘n eenvoudige berghut geslaap met net die kabbellende waterstroompie wat die massiewe stilte verbreek het. Werklik ‘n belewenis! Dit is werklik ‘n groot teleurstelling dat nie een Voortrekker van Swellendam, behalwe tannie Alet Streicher, kans gesien het om hierdie stap mee te maak nie. Ongelooflike natuurervarings is net ‘n klipgooi van ons af.

Die volgende aspekte is gedurende die kwartaal gedek: Openbare optrede – almal het hul stambome by die Drostdy gaan navors, konflikhantering is bespreek en ‘n skattejag is deur die dorp  gehou waar die dorp beter leer ken is en die Groot Trek ook bestudeer is.

Die laaste hoogtepunt van die kwartaal vind op Sondag, 15 September plaas, wanneer oom Jakkie van der Colf op sy epiese landsreis per fiets, by Swellendam aankom en hier oorslaap. Hy is ‘n 77-jarige fietsryer wat 2 500km stoksielalleen op sy fiets aflê om ‘n bewusmaking vir die Voortrekkers te skep. Hy word op elke dorp deur die Voortrekkers of ‘n skool ontvang en inspireer so  oud en jonk landwyd. Al die Swellendam Voortrekkers gaan oom Jakkie by die Drostdy inwag en dan ‘n kort fietstoer deur die dorp saam met hom onderneem.  By die Voortrekkersaal  gaan hy en al die Voortrekkers en hul ouers op worsbroodjies getrakteer word. Hy oornag by Aviento Gastehuis van mev. Juanita Crous. Maandagoggend spring hy om 10h00  by die Laerskool weg op pad na Bredasdorp. Saterdag, 21 September word hy by die Taalmonument ingewag deur al die Voortrekkers wat op Wemmershoek vir die Septembervakansie kamp.

Ons beste wense en baie sterkte aan die volgende leerders wat die Septembervakansie op Wemmershoek gaan kamp:

Graad 8-kamp te Wemmershoek: Jacques Jordaan. Hier word kos deur ruilhandel bekom, mekaar se “aandele” word gekoop en verkoop, pret met kaarte en kompasse en nagavontuur, lekker lê en musiek luister, radiostasie bedryf, verfbal speel en vele meer.

Graad 9-VeldvernufKamp: Jazlynn van Heerden. Hierdie kamp spesialiseer om die kampers die basiese vaardighede te leer van oorlewing in die veld. Saans word daar rondom ‘n groot kampvuur gejol en gesokkie.

Graad 10-Leierskapskamp: Frans-Pieter Coetzer en Aidan Bruce. Lewens- en leierskapsvaardighede word hier aangeleer o.a. deur rotsklim, ziplining, tromme speel, pasta maak, hindernisbaan, “ballroomdancing” en baie ander interessanthede.  Ons sien uit na nog opwinding in die 4e kwartaal.

 

TWEEDE KWARTAAL

Gedurende die eerste kwartaal het die klem geval op buitelugaktiwiteite en die natuur, maar in die 2de kwartaal is daar meer gefokus op binnenshuise aktiwiteite en die aanleer van vaardighede. Ons het baie min tyd tot ons beskikking gehad vir Voortrekkers, weens die baie tyd wat sport en ekstra Wiskunde-klasse opgeneem het.

Buitelugaktiwiteite van die Voortrekkers, soos kamp, vereis baie keer kennis van verskillende knope. Hierdie vaardigheid is opgeskerp sodat die Voortrekkers die nodige kundigheid het as hulle die Gebiedskampe bywoon.

As kultuurorganisasie vir die jeug, is dit belangrik vir die Voortrekkers om tred te hou met tegnologie. Sosiale media speel ‘n baie belangrike rol in die lewe van ‘n Hoërskoolleerder. Daarom is daar tydens ‘n spesifieke byeenkoms in diepte ingegaan t.o.v. die gevare van sosiale media.

Ons was ook bevoorreg om vir Cornel Brink, oudleerder van Hoërskool Swellendam, wat opleiding as Butler ontvang het, om vir ons ‘n aanbieding te doen oor etiket en tafelmaniere. Hy het ook ‘n demonstrasie gelewer oor die verskillende wyses waarop eiers voorberei kan word.

Swellendam Kommando is ook deur die Interdenominational Church uitgenooi om saam met hulle ‘n erediens by te woon.Pastoor Brian John het baie moeite gedoen om die jeug te betrek by die diens en het ook uit sy pad gegaan om die preek op die kinders se vlak aan te bied. Baie dankie aan Jazlynn van Heerden en Jan-Hendrik Engelbrecht wat die Hoërskool Voortrekkers by hierdie geleentheid verteenwoordig het.

Weens die vervroegde eksamen van die Hoërskool, is die jaarlikse Inlywing van nuwe lede uitgestel na Dinsdagaand, 11 Junie. By hierdie geleentheid word daar gefokus op Afrikaanse gedigte en word die nuwe Voortrekkers op luisterryke wyse ingelyf.

Baie groot dank aan die Voortrekkers in die Hoërskool wat dit regkry om onder groot druk van sport en akademie, tyd te maak vir hierdie belangrike kulturele aktiwiteit. Hierdie besige kwartaal het baie eise gestel. ‘n Bergklimuitstappie en ‘n besoek aan die plaaslike hospitaal se noodgevalle eenheid moes afgestel word weens al die ander skoolaktiwiteite.

Paul en Jacques Jordaan gaan vanaf 30 Junie tot 5 Julie die opwindende Winter Waterwerkamp by die Theewaterskloofdam bywoon. Op die kamp spesialiseer hulle in roeikunde, waterdierelewe, weerverskynsels, help om ‘n weerstasie op te rig, watersuiwering en lewensredding. Mag dit ‘n ongelooflike ervaring wees.

EERSTE KWARTAAL

Die Hoërskoolvoortrekkergroep bestaan vanjaar  uit  vier graad 10-leerders, drie graad 9-leerders  en drie graad 8-leerders.Ons het die jaar afgeskop met ‘n Kommandobyeenkoms by die Voortrekkersaal met waterspeletjies en ‘n glybaan. Aangesien die natuur so ‘n belangrike element is van Voortrekker wees, het die groep op die plaas van mnr. Nico de Kock, naby Suurbraak, in die berg gaan stap en in die ongelooflikste bergpoel geswem.

Gedurende die kwartaal is daar gefokus op die Boom-identifiseringkenteken. Ds. Thomas Joubert het die groep deur Koloniebos vergesel en die nodige agtergrond verskaf oor hoe bome geïdentifiseer moet word en die verskillende inheemse bome op die roete aan ons uitgewys.

Die hoogtepunt van die kwartaal was die Kommandokamp op die plaas Sandkraal, van mnr. Chris Coetzer. Die groep het in tente, op die wal van die Breërivier, geslaap. Die Vrydagaand is daar nagmars gehou en die Saterdag het die groep met binnebande vir 6,7km op die rivier gevaar. Dit was ‘n perfekte sonskyndag en ‘n belewenis om die pragtige voël- en dierelewe van die rivier af waar te neem. Die cuppuccino wat ons by Felix Unite geniet het, was net die regte brandstof vir hierdie epiese tog.

Ons besoek aan Bontebokpark, om die Natuurbewaringkenteken te doen, het uitgereën en dit sal in die tweede kwartaal aangepak word. Die groep is deur mnr. Henry van Tonder, die bosbouer van Marloth, genader om hom behulpsaam te wees met die aanplant van geelhoutbome. Dit kon egter nie realiseer nie, weens die groep se betrokkenheid by die toutrek.

Die kwartaal is afgesluit met ‘n pizza-ete by Woodpecker. Op Maandag, 11 Maart, word ‘n laat Valentynsete deur die groep voorberei. Dit bestaan uit ‘n driegang ete wat deur hulself beplan en voorberei word.

Ons het hierdie kwartaal net weer onder die indruk gekom van die pragtige natuurskoon wat Swellendam omring. Binne 10 minute kan jy in die indrukwekkendste kloof staan en voel jy is alleen op die wêreld. Terwyl genoegsame suiwer, skoon water ‘n al hoe groter wordende probleem word in ons land, is Swellendam bevoorreg om van die mooiste en asemrowendste bergpoele binne enige iemand se bereik te hê. Die Breërivier is ‘n lewensaar wat soveel moontlikhede vir ons bied en definitief nooit as vanselfsprekend aanvaar moet word nie!