RUGBY

Al die eerstespanne was vanaf 25 tot 27 April na George en Mosselbaai toe vir ‘n spanbou toer.  Een uit die twee wedstryde is gewen. Dit was egter ‘n goeie geleentheid vir die spelers om te groei as span.  Die res van die seisoen was goed, met gemengde uitslae vir al 3 ons rugbyspanne.  Daar was beslis oomblikke waar die spelers goeie uithouvermoë getoon het.  Ons vra dat al die spelers toegewyd sal bly tot aan die einde van die seisoen.

RUGBY WAT WOEKER!    
Saterdag, 13 April, het Hoërskool Swellendam se rugbyspanne met groot opwinding na Bonnievale vertrek. Die o/15-span se wedstryd het moeilik begin, maar in die tweede helfte het hulle ‘n uitstekende poging aangewend om die wedstryd op sy kop te draai en speel gelyk op. Die o/17-span het ‘n baie uitdagende wedstryd gehad en het net-net teen die tuisspan verloor.

____________________________________________________________________

Die eerstespan se wedstryd was vol opwinding, maar ongelukkig kon hulle nie die wen in die sak steek nie en verloor met twee punte. Die puntemakers was Ammezine Jansen met drie strafdoele en Francesco May met een drie en een doelskop. Die speler van die wedstryd is Diëgo Lotz.

Saterdag, 6 April, het die Eerstespan rugbyseuns dou voor dag in die pad geval om aan die jaarlikse Bellville sportdag deel te neem. Alhoewel hulle net een wedstryd gespeel het, het hulle hul bes gegee en hulel harte uitgespeel! Die rugbymanne het Hoërskool Porterville ore aangesit en met ‘n goeie eerste wen vir die seisoen teruggekom. Baie geluk aan Jenovan Windvogel wat twee drieë gedruk het, Hercshelle Hendriks wat een drie gedruk het en Ammezine Jansen wat een drie en ses punte met sy skop pale toe verdien het. Die beste speler van die wedstryd was Carlos Saayman.