Die Swellie Snoepie word tans deur die kettingwinkel Spar bestuur. Leerders kan kos, lekkers, koeldrank, koffie en nog vele meer by die snoepie koop.

Die eerste hoër onderwys in Swellendam het in 1862 plaasgevind, toe daar ‘n meisieskool gestig is waar die vakke Grieks, Latyn, Matesis, Aardrykskunde, Engels, Skrif en Natuurkunde aangebied is. Die skool het egter in 1868 gesluit weens finansiële probleme. In 1870 is daar ‘n Engelse seunsskool gestig waar Olyfkranskollege vandag staan. Die skool het vinnig gegroei en is selfs bo skole van Kaapstad en Stellenbosch gekies. Later is daar weer ‘n meisieskool, die Girls’ School, gestig.

In 1903 het die twee skole verenig. In 1904 is ‘n skoolgebou vir die verenigde skool opgerig, waar Graad 1 tot matriek onderrig is. In 1915 het die hoërskoolafdeling amptelik sy status as hoërskool gekry. Die hoeksteen van die huidige hoërskool is in 1923 gelê, en in 1928 was die gebou voltooi en die hoër- en laerskool geskei. Sedertien is baie veranderings aan die gebou aangebring, maar die fondament bly dieselfde.

Die skoolwapen is amptelik in 1963 geregistreer. Die eerste skoollied is in 1934 geskryf. Dit was egter nie baie singbaar nie en het ou Afrikaans soos "Op Swellendam met blommeprag kom ons diep lering haal" bevat. In 1981 is die huidige skoollied geskryf deur Mnr. JF Spies van Stellenbosch en dit is getoonset deur Mnr. P van der Westhuizen. Die kinders is vandag beslis nie luier of stouter as die kinders van vorige geslagte nie. Reeds in 1912 het ‘n skoolinspekteur in sy verslag geskryf dat, alhoewel die aantal boeke in die biblioteek vermeerder het, die aantal kinders wat regtig lees verminder het.

Met wiskunde het kinders ook nog altyd gesukkel, en een verslag lui: “In Geometry the attainments are very uneven, the marks ranging from 3 to 90 percent.” En wat stout aanbetref…een oud-leerling vertel hoe hulle Eno’s in die personeel se suikerpot gegooi het en geskater het toe die koppies begin skuim!

By die inwyding van die swembad in 1951 is daar nog gegis oor wie die eer sou hê om die eerste gebruiker van die swembad te wees, toe een seun die ander een sommer klere-en-al ‘inhelp’. Die skool bied vandag nog uitstekende akademiese, sport en kultuurgeleenthede. Elke leerder kan met reg trots daarop wees!